25.2 C
Tonga
Sunday, October 17, 2021

Kuopau ke ma’u e me’a ni ‘e ha tokotaha fili Fale Alea

- Advertisement -spot_imgspot_img
- Advertisement -spot_imgspot_img

Sione Talanoa Fifita – Pouvalu

Kuo tau fanongo kotoa pe foki ‘i he tō folofola ‘a e Tama Tu’í ‘i he huufi ko ia ‘o e to’u Fale Alea ‘o e tau ní. Ko e taha foki e me’a na’e mahino mai mei he tō folofolá ‘a e fiema’u ketau filifili lelei e kakai ki he Fale Alea he ko kinautolu ‘e hoko ko e Pule’anga. ‘I he ‘ene pehē te u lave ai ki he me’a te u siofi ‘i he kanititeiti kotoa pē.

Ko e taha foki e fatongia ‘o e Fale Aleá ko hono sivisivi’i e fakahoko fatongia ko ia ‘a e Pule’angá. Ko e taha leva e me’angāue mahu’inga ‘aupito ki hono fakalele mo hono mapule’i e fakahoko fatongia ‘a e pule’angá ko e patisetí.

Ka vaivai hono fakaanga’i, fakafehufehu’i, mo hono muimui’i ‘a e patiseti ‘a e Pule’angá ‘e malava leva ke pule fa’iteliha pe ‘a e pule’anga ki he ‘enau fakahoko fatongia pea ‘e malava ai ke heva atu ‘a e fakamole pe ko e fu’u fakavalevale ‘a e tānaki pa’anga pea ko e kakai pe ‘e faingata’a’ia ai.

Kuopau leva ke ‘i ai ha ‘ilo loloto ‘a e fakafofonga ki he natula mo e fatongia ‘o e patiseti, mo e anga hono fatu, mo e anga hono sivi’i ‘o e fakahoko fatongia ‘a e Pule’angá ‘o fakafekau’aki ki he patisetí.

Ko e fatongia mahu’inga ia ‘o e fakafofonga Fale Alea ke ne siofi ofi ‘aupito ‘a e anga ko ia ‘o hono mapule’i ‘a e ngaahi fakamole ‘a e Pule’angá (public expenditure management). Pea ko e patiseti ‘a e me’angāue ke nofo mo ia ma’upē.

‘Oku ‘i ai e fo’i taumu’a lalahi ‘e tolu ‘o e public expenditure management ke ne fakamamafa’i ma’upē ‘i he taimi hono alea’i mo hono siofi ‘o e patiseti ‘a ia ko e (1) ko hono siofi e fepalanisi’aki ‘o e pa’anga tānaki mo e pa’anga fakamolé (fiscal decipline); (2) ko e anga mo e founga ‘o hono vahevahe ‘o e pa’anga (strategic resource allocation); pea mo e (3) ko hono fakapapau’i ‘oku si’isi’i e fakamole ‘i he ngāue ki hono fakalele ‘o e pule’angá (efficiency).

‘I hono sivisivi’i e ngaahi taumu’a lalahi ko ‘eni kuopau ke ‘i ai ‘a e ‘ilo ‘a e fakafofonga ki hono fakamali’i ‘o e ngaahi palani ngāue fakapotungāue pea mo e patiseti koe’uhi ke fai ai hono sivi’i ‘a e fakahoko fatongia ‘a e potungaue takitaha.

‘Oku lahi leva e ngaahi fehu’i ke ‘eke ‘i he hili ange ‘o e fo’i fakamali’i ko eni pea ko e ngaahi fehu’i ko ia kuopau ke taliui ki ai ‘a e minisita kotoa pea ‘oku ‘ilo’i mei heni ‘a e ‘alu kehe atu pe ‘a e ngaahi fakamole fakapotungaue mei he patiseti, pea ‘e lava ke fai ai ha sio ki he hono taufetuku takai holo ‘e he minisita ‘ene vouti fakapotungaue.

‘E ‘ilo ai heni pe na’e fai e taufetuku holo ‘o fakatatau ki he ngaahi taumu’a ngaue tefito mo mahu’inga (priorities) pe na’e taufetuku holo pe ia ‘i he fanga ki’i me’a maumautaimi.

‘Oku mahu’inga ke tuku loto’i ‘e he fakafofonga kotoa ko e taimi ‘e vaivai ai ‘ene ‘ilo ki he patiseti, he’ikai ke uesia ‘a e fonua ‘i he ta’u fakapa’anga lolotonga pē, ka ‘e heva atu ‘a e ola tamaki ki he ngaahi to’utangata hono hoko mai. ‘Ikai ko ia pe ka ‘e fai ai hono fakapapau’i ‘oku ‘ikai ke li’aki ha taha pe fai e tufá ‘i ha founga filifilimaanako.

Te u toki hoko atu he ‘oku mahu’inga ‘aupito ‘a e kaveinga ni.

- Advertisement -spot_imgspot_img
Latest news
- Advertisement -spot_img
Related news
- Advertisement -spot_img
Get Exciting News from Talanoaotonga.com

by Subscribing us Today

With your Email.