Kalafi Moala

‘Oku ‘i ai ‘a e fifili lahi, pe ko e ha nai e palani pe ko e ngaahi fokotu’utu’u ne fai ‘e he Pule’anga, kae tautefito ki he Potungaue Mo’ui, he ta’u ko ‘eni ‘e meimei ua, ‘o fiema’u ha ‘aho ‘e 3 ke nau toki fakataha ke fai tu’utu’uni ki he Covid 19 kuo tu’uta mai ki Tonga ni?

‘Oku mahino ‘oku ‘ikai ke fai ha mateuteu ki he me’a ni, neongo ne toutou fakamatala mai ‘oku ‘osi ‘i ai e fokotu’utu’u pau ‘i ha tu’uta mai ‘a e vailasi ni.

Ka, ko ‘eni kuo fakaha ‘e toki fai ha tu’utu’uni ‘i he Monite 1 Novemá.

Ko e lea tonu na’e fai ‘e he Minisita Mo’uí, Dr. ‘Amelia Tu’ipulotu, ko e fehu’í ia ‘oku ‘ikai “pe ‘e tu’uta mai ‘a e vailasi pe ‘ikai”, kā ko e “kuopau ke tu’uta mai, ko e lau taimi pe.”

Kapau leva ko ia, ko e ha e fokotu’utu’u ki ha me’a ke fai ka fakatu’upaké ‘a e a’u mai ‘a e vailasí?

Kā, kuo toki mahino ‘a e me’a koee ‘oku fakamu’omu’á, hili ‘a e fanongo he lea kemipeini ‘a e Minisitā Mo’ui ma’ae Palemiá ‘i he fakataha ne fai ‘i Lapaha he Tu’apulelulu kuo ‘osí.

Ko ‘etau toki sio ‘eni he hopo mai ‘a ha Minisitā ‘o e Kapinetí ‘o fai ha lea mo ha kemipeini’i tavale ‘o e Palemiá. ‘Oku ‘ikai ke kanititeiti ‘a e Minisitā ia, ka ‘oku ne Minisitā foki koe’uhí ko e Palemiá na’a ne fili iá.

‘Oku kau ‘a e Minisitā Mo’uí he kau minisitā ngāue lelei, pea ‘oku hā mai pe ia ‘i he ola lelei ‘a e ngāue ‘a e Potungāue Mo’uí.

Kā, kuo hopo mai ‘a e Minisitā ‘o ne fai ha fakafotunga kehe he’ene kemipeini ko ‘eni ma’ae Palemiá ‘i Lapaha.

Lea lahi, lea ‘afungi, pea lea ta’e’ilo, ‘o fai hono tāpalasia e kau ‘ave fakamatalá, kau ai e mitiá. Talu e Minisitā ‘a e tokotaha ko ‘ení ‘oku te’eki ai ke fai ha sio ia ki ha’ane lea pe to’onga pehe ni.

Malo mo e kemipeini ‘a e Palemiá ‘i Lapaha, ke toki vakai atu ai ki he’ene fakafotunga totonú.

Ko e hili pe ia ‘a ‘ene tala ko e loi pea ko e fakamatala hala ‘oku ‘i ai ha taha ‘oku tu’uta ‘i Tonga ni mo e vailasi, pea ‘i he ‘aho pe ‘e tahá, kuo ‘asi mai ai ‘a e Palemiá ‘o ne fakahā kuo ma’u e tokotaha ne tu’uta mai ki Tonga ni mo e vailasi.

Tu’uta mai e vakapuna mei Christchurch he Pulelulu mo e pasese na’e tesi positiví, fai e fakataha kemipeiní na’e lea ai e Minisitā he Tu’apulelulu, pea ma’u mai e ola ‘o e tesi e kau pasese he Falaite, ‘o toki fakaha ki he fonuá.

Kapau leva na’e ki’i māmālie hifo ‘a e Minisitā kae tuku ‘ene ‘oho tavale he kemipeini’i ‘o e Palemiá ‘o hoko ai hono taku ‘o pehe ne loi. Ko e ha na’e ‘ikai ke tatali pe ke toki mahino ‘a e tesi kae toki fai ‘ene leá?

Kaekehe, ‘oku matu’aki mālie ‘aupito ‘a e ‘otu mu’a ‘a e kau Minisitā ‘o e Kapinetí he kemipeini’i honau heló, he ko e fokotu’utu’u foki ‘ena ke fai hano veimau’i pe kohai ‘e Palemia he Pule’anga hokó kapau te nau hū ki Fale Alea.

Tā, ‘oku mo’oni pe ‘a e ngaahi tukuaki’i ‘o e lotu ‘aukaí mo e ngaahi me’a kehekehe ne kau ki ai e kau Minisitā, ko ha kemipeini fili Fale Alea ma’ae Pule’angá.

Kā, kuo hūmai e vailasi ki Tonga ni, kae kei lele tavale pe kemipeini ma’ae Palemiá, neongo e fele faufaua ‘a e fehalaakí.