FACT CHECKING – ‘OKU ‘IKAI MO’ONI E TUKUAKI’I KO E FEINGA KE FAKATOKOSI’I ‘A MĀMANI

    0
    48

    Supa Mario

    Kuo toutou tuku atu ha ngaahi fakamā’ala’ala pea mo hono fakatonutonu ‘a e ngaahi fakamatala ta’emo’oni kuo tuku mai ‘e he kau Faifekau fekau’aki pea mo ‘etau huhu malu’i. ‘I he fuofua episode ‘a e polokalamá ni, ne lave ki hono fakatonutonu ‘a e tukuaki’i hala ‘o pehē ko ha huhu malu’i mRNA ‘oku tau ngāue’aki ‘i Tongá ni. ‘I he episode hono uá, ko hono fakatonutonu ‘a e tukuaki’i hala ‘o pehē na’e ‘ikai ke tesi ‘a e huhu malu’í ka kuo toki ‘omi koaa ke tesi ‘iate kitautolu. Pea ko e hoko atu ‘eni ‘o e talanoa:

    Ko e feinga ‘osikiavelenga ‘a e Potungāue Mo’uí ki hono malanga’i mo huhu malu’i ‘a e kakai ‘o e fonuá. Kuo mahino kiate kinautolu ‘oku ‘i ai hotau ni’ihi ‘oku ‘ikai ke fie huhu malu’i ‘i he ngaahi ‘uhinga kehekehe. Pea ko e konga lahi ai ‘oku fekau’aki pea moe ‘uhinga fakalotu ‘a ia ‘oku toutou malanga mai ai ‘a e kau Faifekau ko ‘eni. Ne toutou fakamatala ‘e he Potungāue Mo’uí ‘a e taumu’a tatau ‘o e huhu malu’i ko ‘eni Astrazeneca pea mo e ngaahi huhu malu’i ne ngāue’aki ‘e Tongá ni kimu’a ‘o hangē ko e huhu malu’i ki he Mīselé. Ka na’e tali’i mai ‘eni ‘e Simana Kami ‘aki ‘ene pehē:

    “…Ko e ‘ū faito’o ko ia, hala ha Toketā ia ‘i muli tene fakafepaki’i…”

    Ka ‘oku mo’oni nai ‘a e fakamatala ko ‘eni?

    ‘I he hangē ko ‘enau ngaahi fakamatala kuo fakahoko kimu’a pea lave ki ai ‘a e polokalamá ni, ‘oku toe loi moe fakamatala ko ‘eni. Pe ko e fehu’i:

    Na’e ‘i ai nai ha Toketā na’á ne fakafepaki’i ‘a e huhu malu’i ki he Mīselé? Ko e tali ki ai ko e ‘io. Na’e ‘i ai ha Toketā ko Andrew Wakefield. ‘I he 1998 na’e paaki mai ai ‘i he “The Lancet” ‘a ‘ene pepa pea na’e fakahā ai ‘oku malava ‘e he huhu malu’i Mīselé ‘o fakatupunga ‘a e fokoutua ‘oku ‘iloa ko e “Autism”. ‘I he taimi na’e ‘ilo ai kimui ‘oku loi ‘a e fakatotolo ko ‘eni, ne ‘ikai ngata hono fakata’e’aonga’i ‘ene fakatotoló, kae pehē ki hono tu’unga ko e Toketā ‘i Pilitāniá. Ko e hā e me’a ‘oku tau ako mei heni?

    1) ‘Oku loi e fanga ki’i ‘uhinga ‘oku tuku mai ‘e he kau Faifekaú ni, pea ‘oku taau ki he kakai ‘o e fonuá ke ‘oua tenau tui noa’ia ki ai.

    2) ‘Oku malava ‘i ha ngaahi taimi ke hala ha aofangatuku pea mo ha faka’uhinga ‘a ha Toketā. Pea ‘oku ‘ilonga ia ‘i he taimi ‘oku sivi’i ai ‘e he toenga ‘o e kau mataotao he mala’e fakafaito’ó pea ‘oku nau ‘omi leva – na’e hala e ngāue moe ngaahi faka’uhinga ‘a e Toketā ko Sione mo Mele ‘o makatu’unga ‘i he ngaahi ‘uhinga 1, 2, moe 3.

    Ko e me’a tatau ‘oku hoko ‘i he ‘etau huhu malu’i ki he Covid-19. Kuo ‘i ai ha kau Toketā kuo nau ‘asi mai mo ha ngaahi fakamatala ‘o ‘ikai kenau poupou’i ‘a e huhu malu’i. Ka ‘i he hili hono vakavakai’i ‘e he kau mataotaó, ‘oku nau tuku mai leva ‘a e ngaahi ‘uhinga lelei ‘oku hala ai ‘a e lau ‘a e Toketā ko ia. ‘Oku fekau’aki ‘eni pea moe taha e ngaahi fakamatala ne fakahoko ‘e Barry Taukolo ‘o pehē ko e side effects ‘o e huhu malu’i ‘e ‘ikai toe malava ‘a e kakaí kenau fakafanau pe fā’ele (hūfanga he fakatapu).

    Ko e ngaahi fakamatala ko ‘eni ‘a Barry Taukoló, ko e ngaahi fakamatala ia na’e fakahoko ‘e ha kau Toketā kimu’a, pea ‘e lave lahi ki ai heni. Kaekehe na’e toe lave foki ‘a Barry Taukolo ko e taha pē ‘eni ‘a e ngaahi palani ke fakatokosi’i koaa ‘a māmani.

    ‘Oku mo’oni nai ‘a e tukuaki’i ko ‘eni? Ko hono ‘omi nai ‘eni ‘o e huhu malu’í ke huhu ‘aki ‘a e kakaí ke ‘oua tenau toe lava ‘o fakafanau kae lava ke fakatokosi’i ‘a māmani?

    ‘Oku ‘ikai mo’oni ‘a e tukuaki’i ko ‘eni.

    ‘Oku ‘i ai e fo’i sino ‘i ‘Iulope ‘okú ne fakapapau’i mo faka’atā ha fa’ahinga faito’o ke toki ngāue’aki. Ko e sino ko ‘ení ko e EMA, pe European Medicine Agency. ‘I he ‘aho 1 ‘o Tīsema 2020, ne fakahū ai ‘e ha ongo Toketā ‘e 2 ki he EMA, ‘a ‘ena kole ke ta’ofi ‘a hono tesi ‘o e huhu malu’i Pfizer. Ko Dr Wodarg pea mo Dr Yeadon. Na’á na tui ko e kakai na’e volenitia ke tesi ‘a e huhu malu’i Pfizer ‘e hoko e palopalema kiate kinautolu ‘o ‘ikai tenau toe lava ‘o fakafanau.

    ‘Oku ‘i ai e ki’i Blog ‘i he ‘initānetí ‘oku ‘iloa ko e “Health and Money News”. Ko e fuofua feitu’u ‘eni na’e tuku mai ai ‘a e ongoongó ni, ‘a ia ‘i he ‘aho hono hokó, ko e ‘aho 2 ‘o Tīsema 2020. Ko e fo’i fakakaukau na’e tuku mai ‘e he ongo Toketaá ni, ‘oku makatu’unga ia ‘i he “spike protein” ‘i he huhu malu’i. Pea ko ha ki’i fakatātā faingofua ‘eni ke mahino ai.

    Tau fakakaukau ki he ngaahi fo’i tona ‘i ha sū ‘akapulu, ‘a ia ‘oku fa’a ui ko e sū sipaiki. ‘Oku ‘i ai e ngaahi fo’i “spike” fōtunga pehē ‘i he vailasí, pea ‘oku ui ko e “spike protein” ‘i he fo’i vailasí. ‘Oku hoko e fo’i “spike protein” ‘o hangē ko ha fo’i kī ki ha matapā. ‘Oku hanga ai ‘e he “spike protein” ‘o fakaava e matapā ‘i he fanga ki’i cell ‘o e sinó pea ‘okú ne hū ai ki loto ‘o fakahoko e maumau, ‘o malava ai ketau puke ‘o iku ki he mate. Ko e taha e ngaahi fatongia ‘o e kau sotia malu’i ‘o e sinó ko hono ‘ohofi ‘a e fanga fo’i “spike protein” ke ‘oua na’a nau lava avangi e matapā ki he cell hotau sino.

    ‘Oku fa’u leva ‘a e ngaahi huhu malu’í ‘o fakatatau ki he fakakaukau ko ‘eni. Fakafou ‘i he huhu malu’í, ‘e fa’u ‘e he sinó ‘a e fanga ki’i fo’i “spike protein” pea tuku ange mai leva ‘a e kau sotia malu’í kenau hanga ‘o ta’ofi. Pea ka toki faifaiange ha taimi ‘o hū atu e fo’i vailasi mo’oní, kuo ‘osi ‘ilo lelei ‘e he kau sotia malu’í ‘a e “spike protein” pea ‘e vave ange ai ‘enau ngāue mai ki hono malu’i ‘o e sinó.

    Ko e hoha’a leva ‘a e ongo toketā ko ‘eni koe’uhi ko ‘ena tui ‘oku fōtunga tatau ‘a e “spike protein” ‘i he huhu malu’í, pea mo ha protein ‘i hotau sinó ‘a ia ‘oku tokoni ki he fakafanaú. Pea kapau ‘e ‘ohofi ‘e he kau sotia malu’í ‘a e “spike protein”, na’a na hoha’a telia na’a toe hanga hake ‘a e kau sotia malu’í ‘o ‘ohofi moe protein ko ‘eni, pea ‘e pa’a leva ‘a e kakaí ‘o ‘ikai ke toe lava ‘o fakafanau.

    Kaekehe, kuo ‘osi fakahoko ‘e he kau mataotao fakafaito’ó hono toutou vakai’i pea nau aofangatuku ‘oku ‘ikai mo’oni ‘a e hoha’a ko ‘eni. Ko e pehē ko ia ko e “spike protein” ‘e ma’u mei he huhu malu’í ‘oku fōtunga tatau pea mo e protein ‘i hotau sinó ki he fakafanaú, ‘oku hangē ia ko hano talamai ‘oku tatau e fika telefoní ‘a Sione ko e 7712345 pea moe fika telefoni ‘a Mele ko e 7754321. Neongo ‘oku tatau ‘a e 77 ka ‘oku kehekehe ‘a e ngaahi mata’i fika kimuí. He’ikai ha taimi ia teke taila e fika ‘a Sioné pea tatangi mai e fika ‘a Melé he ‘okú na fika kehekehe neongo ‘okú na tatau he 77. Pea ‘oku pehē pea mo e lau ko ‘eni ‘o pehē ‘oku tatau koaa ‘a e “spike protein” ‘i he huhu malu’í, pea moe protein ‘i he sinó ki he fakafanau.

    Ko e me’a ‘e taha ke toe fakatokanga’i, ko e “spike protein” ‘e ‘omi ‘e he huhu malu’í ‘oku tatau ia pea moe “spike protein” ‘i he vailasí. Ko e taumu’a foki ia hono fa’u e huhu malu’i, ‘o hangē na’e ‘osi fai ki ai ‘a e lavé. Pea kapau na’e mo’oni ‘a e hoha’a ‘a e ongo toketā ko ‘eni, ne ‘osi totonu ke lau miliona e kau pa’á ‘i mamani. ‘O angafēfē?

    Kuo a’u ‘o toko 218 miliona ‘i māmani kuo ma’u ‘e he vailasí. Kuo mate ai ha toko 4 miliona tupu kae mo’ui ‘a e toko 194 miliona tupu. ‘Oku ‘uhinga ‘eni, ko e fu’u kakai kotoa ‘e 194 miliona ‘oku mo’ui meí he vailasí, ne ‘osi hū e vailasí pea mo hono “spike protein” ki honau sinó. Ne ‘osi hanga ai ‘e he sotia malu’i honau sinó ‘o ‘ohofi ‘a e “spike protein”. Pea kapau na’e mo’oni e lau ‘a e ongo toketaá ni, ne totonu ke toe hanga hake pē ‘a e kau sotia malu’í ‘o ‘ohofi moe protein ki he fakafanaú. Ne totonu ke pa’a kotoa ‘a e fu’u toko 194 miliona ko ‘eni ‘o kapau na’e mo’oni e lau ‘a e ongo Toketā ko ‘eni.

    Ka ‘oku ‘ikai foki ke mo’oni koe’uhi kuo ‘osi fakamo’oni’i ‘a e kei fā’ele mo fakafanau ‘a e fu’u kakai tokolahi meí he toko 194 miliona ko ‘eni. Ne ‘i ai mo ha toketā ‘e taha ko Roger Hodkinson ‘a ia na’e tuku mai ‘e he ongoongo ‘a e “The European Union Times” ha’ane ngaahi fakamatala. Ne toe fakahoko pē ‘e he Toketaá ni ‘a e hoha’a natula tatau. Pea na’e ‘osi vakavakai’i ‘e he kau mataotao fakafaito’ó, ‘o nau toe aofangatuku ‘o ‘ikai ke mo’oni.

    Ko e ngaahi kaveinga ‘eni ia kuo fuoloa hono fakamā’ala’ala, fakatokanga’i ange ko e talanoa ‘eni ‘i Tīsema ‘o e ta’u kuo’osí. Kuo ‘osi fakamahino ‘o mahino pea kuo hoko atu ‘a māmani ia mei ai. Ka ‘i hono kei ‘omi ‘e Barry Taukolo pea moe kau Faifekaú ni ‘a e ngaahi tukuaki’i tatau, ‘oku fai ai hono fehu’ia pē ko e hā kuo kei keli hake ai ‘a e ngaahi tukuaki’i fuoloa ko ‘eni, ‘a ia kuo fuoloa hono fakapapau’i ‘oku ta’emo’oni? Ko e hā nai ‘a e taumu’a?

    Kaekehe, ‘e hoko hoko atu ‘a e polokalamá ni ki hono fakatonutonu, pe “Fact Check” e ngaahi fakamatala ta’emo’oni fekau’aki pea mo ‘etau huhu malu’i.