FACT CHECK: ‘Oku ‘ikai ko ha mRNA ‘a e huhu malu’i ‘a Tonga

    0
    36

    Supa Mario

    ‘I he ‘aho Falaite 27 ‘o ‘Aokosi 2021, ne fakamafola mai ai ‘e he Televīsone DBN, pe Doulous Broadcasting Network ha polokalama. Ne kau ki he polokalamá ni ha kau Faifekau ‘o hangē ko Barry Taukolo, Simana Kami pea mo Saimone Finau. Ne kau ‘i he ‘enau polokalamá ‘a ‘enau lave ki he huhu malu’i. ‘Oku fie puke ai ‘a e faingāmalié ni ke ‘oatu ha ki’i huluhulu pea mo ha fakatonutonu ki he ngaahi fakamatala ta’emo’oni, hala pea loi na’á nau tuku mai.

    Ko e fuofua fehu’i:

    ‘Oku falala’anga nai ‘a e kau Faifekaú ni ketau tui kiate kinautolu ‘i he ‘enau talanoa ki he ngaahi me’a fakafaito’o ‘oku ‘ikai ha’anau ‘ilo ki ai?

    Fakatatau ki he ngaahi fakamatala ‘a e kau Faifekaú ni, ne ‘osi fakahoko ‘enau ngaahi fakatotolo.

    Ko e hā nai e ola ‘o ‘enau ngaahi fakatotoló ni?

    Fakatatau ki a Simana Kami, ko e tokotaha taki ‘o e Kautaha Mo’ui ‘a Māmani (pe WHO) ko e tokotaha mei ‘Itiopea. Pea fakatatau ki a Simana pea mo ‘ene fakatotolo, ‘oku hala’atā ha ‘ilo faka-Toketā ‘a e tokotaha ko ‘eni.

    ‘Oku mo’oni nai e fakatotolo ko ‘eni ‘a e Faifekau?

    ‘Oku mama’o faufaua ‘eni meí he mo’oni. Ko e Talēkita Seniale ‘o e WHO na’e ma’u hono BA ‘i he Biology mei Asmara. Na’á ne hoko mai ai ki hono ma’u hono Master of Science ‘i he tafa’aki Immunology of Infectious Disease meí he ‘Univēsiti ‘o Loniton. Ne ma’u hono PHD ‘i he Community Health meí he ‘Univēsiti ‘o Nottingham pea mo ‘ene ngaahi lavame’a kehekehe he mala’e ‘o e ako kae pehē ki he ‘ene to’o fatongia he tafa’aki ki he mo’ui. Ko e fehu’i:

    Ko e hā nai e tu’unga faka-Toketā ‘o Simana Kami ‘okú ne ma’u kene fehu’ia ‘a e tangatá ni?

    Pea ‘ikai ke ngata ai, ko e hā nai kuo loi pehē ai e fakamatala ‘a Simana ‘o fekau’aki pea moe tokotahá ni? Kapau ko e ‘ātunga ‘eni ‘a e fa’ahinga fakatotolo ‘a e kau Faifekau ni, ‘oku falala’anga nai ketau tui ki ai?

    Ko e hā nai ha toe fo’i fakatotolo na’e fakahoko ‘e he kau Faifekaú ni?

    Ne fakamatala ‘e Simana Kami ki he me’a ‘i loto ‘i he huhu malu’i ko ‘eni ‘o ne pehē ko e tokosi’i pē ‘oku nau ‘ilo ki ai. Na’á ne pehē ai ko ha polokalama pe software MRNA, ‘oku huhu ki hotau sino

    Ka ‘oku mo’oni nai ‘a e fakamatala ko ‘eni? Ko ha huhu malu’i MRNA ‘oku tau ngāue’aki ‘i Tongá ni?

    Ne toe hoko atu ‘ene fakamatalá ‘o pehē ‘e hanga ‘e he polokalama ko ‘eni ‘o fakapolokalama’i hotau DNA. Ne tānaki mai ki ai ‘a Saimone Finau ‘o ne pehē ‘e huhu pe kae ‘oua kuo mafuli ‘etau fakakaukau. Ne poupou hake ai ‘a Barry Taukolo ‘o ne toe fakamatala ‘e huhu ha taha pea mafuli hono ‘atamai. Ne tokoni hake heni ‘a Simana ‘o ne talanoa kuo liliu e DNA ‘o e ni’ihi kuo huhu malu’i pea ‘e malava kenau hangē ha fanga fu’u zombies koe’uhi ko e software MRNA na’e huhu kiate kitautolu.

    Ko hono fakanounou ‘o ‘enau ngaahi fakamatalá. Tokua ko e huhu malu’i mRNA ‘eni ‘oku huhu kiate kitautolu. Pea tokua kuó ne liliu hotau DNA. Pea tokua tetau hangē ha fanga fu’u zombies ‘i he faivá. Ka ‘oku mo’oni nai ‘eni?

    Mahalo na ‘oku ki’i lahilahi e sio faiva ‘a e kau faifekaú ni koe’uhi ‘oku matu’aki ta’emo’oni pea loi ‘enau ngaahi fakamatalá ni. Ko e ngaahi kautaha kehekehe na’a nau fa’u ‘a e huhu malu’i ‘o fakataumu’a ki he fatongia tatau. Ko hono ‘ako’i e kau sōtia malu’i ‘o e sinó kenau mateuteu ki ha toki hū atu ‘amui ‘a e fo’i vailasí, kuó ne ‘osi lava ‘o matu’uaki.

    Ko e huhu malu’i ko ‘eni ‘oku ngāue’aki ‘e Tongá ni ko e Astrazeneca ‘oku kau ia ‘i he kalasi ko e Viral Vector Vaccine. Pea ‘oku ‘i ai leva moe kalasi ‘e taha ‘oku ui ko e mRNA Vaccine. Ko e kalasi ‘eni na’e fa’u mei ai e huhu malu’i ‘a e Pfizer pea moe Moderna ‘a ia ‘oku ngāue’aki ‘e ‘Amelika.

    Sai, ‘oku fakamatala mai e kau Faifekaú ni ‘i he mRNA Vaccine. Ka ko e huhu malu’i Astrazeneca ‘oku tau ngāue’akí, ‘oku ‘ikai ko ha mRNA Vaccine, ka ko e Viral Vector Vaccine. ‘Oku kehekehe ‘a e ongo kalasi ko ‘eni neongo ‘oku tatau ‘a ‘ena taumu’a ngāue ki hono malu’i ‘o e sino. Pea kapau tetau ngāue’aki ha ki’i fakatātā faingofua ke mahino ange, ki he fokoutua ko e fakalele (hūfanga he fakatapu). ‘Oku kehekehe ‘a e ngaahi faito’o ‘e ala sai ki ai ‘a e fakalelé pea ‘oku kau ai ‘a hono inu ha kapainu 7up, pe ko ha inu ha fo’i niumata. ‘E malava ke fakatou sai ki ai ‘a e fakalelé. Pea ‘oku tau lolotonga inu ‘eni he fo’i niumatá pea ‘asi mai e kau Faifekaú ni ‘o talamai na’e fai ‘ene fakatotolo ‘o ne ‘ilo ‘oku kovi kapainu 7up ki he sino. Pea tetau tala ange ki ai, ‘oku ‘ikai ketau inu 7up ka ko e inu niumata.

    Pea ‘oku pehē pe mo ‘eni. Kuo talamai ‘e he kau Faifekaú ni ‘oku kovi ‘a e huhu malu’i mRNA ka ‘oku ‘ikai tenau ‘ilo’i ‘oku ‘ikai ketau ngāue’aki ‘a e huhu malu’i mRNA. Ko e fo’i niumata ‘oku tau inú ko e Astrazeneca. Kapau ‘oku loto ‘a e kau Faifekaú ni kenau fakaanga’i ‘a e huhu malu’í, pea ‘uluaki ‘ai kenau ‘ilo ‘a e huhu malu’i ‘oku tau ngāue’akí. Ka ko e ‘ātunga foki ia ‘a e ha’u ‘a e kau Faifekau ‘o fakamatala he me’a fakafaito’o ‘oku ‘ikai ha’anau ‘ilo ki ai. Kuo nau fakahoko ai e fakamatala ta’emo’oni, hala pea mātu’aki loi. ‘Oku ta’engali ‘aupito ‘eni ia pea mo honau lakanga faka-tauhisipi.

    Makehe ange meí he loi ‘enau fakamatalá, ‘oku toe fepakipaki pe foki ‘enau ngaahi fakamatalá ‘iate kinautolu. Ne fakahā ‘e Barry Taukolo ko e huhu malu’i ‘eni ia na’e te’eki ke sivi pe tesi’i ‘i he fanga monumanú ka kuo ‘omai ke fuofua tesi ‘i he tangata. Pea neongo hono fakamatala ‘e Barry ‘oku te’eki ke sivi mo tesi ‘i he fanga monumanú, kuo fakamatala ‘e Saimone Finau ‘a e me’akehe ‘o pehē na’e sivi he fanga monumanú pea nau mate. ‘Oku pau koaa ki he hā ‘enau fakatotolo na’e fai?

    Nenau fakamatala foki ‘oku takitaha tau’atāina ki he ‘ene fili ke huhu pe ta’ehuhu. Pea kapau ‘oku mo’oni ‘eni, ne taau kenau tuku ange ‘a e kakaí kenau huhu tau’atāina. Ka kuo toe fakamamafa’i mai ‘e Barry Taukolo ‘oku totonu ke ta’ofi ‘a e huhu malu’i.’Oku fepaki ai heni ‘enau talamai ‘oku tau’atāina ‘a e kakai ke huhu pea ‘i he taimi tatau toe fiema’u mai ke ta’ofi ‘a e huhu. ‘Oku ‘i ai mo e ngaahi tafa’aki kehe ke fakamā’ala’ala pea fakatonutonu ‘i he ‘enau polokalamá, pea ‘e toe hoko atu ki ai ‘i he kaha’u.