FACT CHECK: DR RAY EBRAHIM PEA MO ‘ENE NGAAHI FAKAMATALA TAKIHALA’I

    0
    443

    Supa Mario

    ‘I he ‘aho Tusite 7 ‘o Sepitema 2021, ne fakamafola mai ai meí he televīsone DBN, pe Doulous Broadcasting Network ha polokalama. Ko e polokalamá ni ne kau ki ai ‘a Faifekau Sitiveni ‘Aipolo, Faifekau Barry Taukolo, kae pehē ki he Toketā ko Ray Ebrahim. Ne lahi e ngaahi me’a kehekehe na’a nau lave ki ai pea ‘oku faka’amau ai ‘a e polokalamá ni ke fai hono fakatonutonu telia na’a ma’u hala ‘a e kakai ‘o e fonuá.

    Ne lave ‘a Dr Ray ki he sino ko ‘eni ko e FDA mei ‘Amelika ‘oku fakamafai’i kene sivi mo fakapapau’i ‘oku malu ha ngaahi faito’o. Ne ‘omi ai ‘e Dr Ray ‘a e fakalōloa ‘o e FDA ko e Food Drugs Association.

    Kapau ne ‘i ai ha fānau ako na’e mamata he polokalamá ni, ‘oku mahu’inga kenau fakatokanga’i ‘oku hala pea ta’emo’oni ‘a e fakalōloa ko ‘eni. Ko e FDA ‘oku ‘ikai ko e Food Drugs Association, ka ko e Food and Drugs Administration. Pea mahalo na ko ha ki’i feto’oaki pē ‘a Dr Ray ka ‘oku ha’u ai ‘a e fehu’i ko ‘eni:

    Ko e hā nai ha toe ngaahi me’a na’e feto’oaki ‘e Dr Ray heni pea ‘e ngali hoko ai kene takihala’i ‘a e kau mamata?

    Ne toe lave foki ‘a Dr Ray ‘o pehē ko e huhu malu’í ni ‘oku ‘ikai ko ha huhu malu’i ma’ae tokotaha kotoa. Pea fakatatau ki a Dr Ray ‘oku tapui mei he WHO ke huhu malu’i ‘a e ni’ihi ‘oku nau mo’ua ‘i he fokoutua ko e suka. Ne tokoni heni ‘a Faifekau Barry Taukolo ki hono fakatonulea ki he fakamatala faka-Tonga.

    ‘Oku fakahoko e tokanga lahi ki heni koe’uhi ko e talu e kamata ‘etau huhu malu’í pea mo hono fakahā mai meí he Potungāue Mo’uí ke tomu’a huhu ‘a e kakai ko ‘eni ‘oku ‘i ai honau ngaahi mahaki tauhi ‘o hangē ko e suka. Ne toe fakamamafa’i mai heni ‘e Faifekau Barry Taukolo ko e ngaahi fakamatala ‘a Dr Ray ‘oku ha’u hangatonu pea meí he WHO.

    Ka ‘oku mo’oni nai ‘a e ngaahi fakamatala ko ‘eni? Kuo tapui nai pea meí he WHO ke huhu malu’i ‘aki ‘a e Astrazeneca ‘a e ni’ihi kuo ‘i ai honau ngaahi fokoutua ko ‘eni na’e fakalau ‘e Dr Ray pea mo Barry Taukolo?

    ‘I he ‘aho 2 ‘o Sepitema 2021, na’e tuku mai ai ‘e he WHO ‘a e ngaahi fakamatala ko ‘eni fekau’aki pea mo e huhu malu’i Astrazeneca.

    (Reference: https://www.who.int/news-room/feature-stories/detail/the-oxford-astrazeneca-covid-19-vaccine-what-you-need-to-know)

    Ne tohi’i ‘uli’uli mo hinehina mai ai, ‘o ‘ikai ha toe veiveiua ‘oku kau ‘a e ni’ihi ‘oku suká ‘i he fiema’u ke huhu malu’i. ‘Oku kau ki ai mo ha ni’ihi ‘oku mahaki mafu pea moe ngaahi fokoutua ko ia. ‘Oku fai ai e fifili:

    Ko e WHO fē koaa ‘oku fai fakamatala mei ai ‘a Dr Ray pea mo Barry Taukolo? Ko e toketā WHO koaa pe ko e toketā TKO?

    Na’e ‘ohake ai ‘e Dr Ray ‘o pehē ko e huhu malu’i Astrazeneca na’e ta’ofi ia he ngaahi fonua ‘e 28 ke ‘oua e ngāue’aki: Ne tokoni hake ‘a Faifekau Barry Taukolo ‘i hono fakatonulea’i ‘eni ki he lea fakaTonga. Ko e hā nai e mo’oni ‘o e ngaahi fakamatalá ni?

    ‘Oku mo’oni e ngaahi lave ki hono ta’ofi ‘e he ngaahi fonua ‘e ni’ihi ‘a e Astrazeneca. Ka ko e fakamatala ‘eni ‘oku ta’ekakato, pea ‘i he ‘ene ta’ekakató tene ala fakatupu ‘a e takihala’i. ‘O hangē ko ‘eni, ‘i he fanongo ‘a e tokolahi ki hono talamai na’e ta’ofi ‘a e Astrazeneca ‘i he ngaahi fonua lahi ke ‘oua e ngāue’aki, pea tenau ‘eke leva, ka ko e hā ‘oku ‘omai ai ki Tongá ni?

    Ko e ki’i puipuitu’a nounou pe ki he ‘etau huhu malu’i Astrazeneca. ‘I he ‘aho 29 ‘o Sānuali 2021, ne ‘omi ai ha ongoongo meí he EMA, pe European Medicine Agency kuo faka’atā ‘a e huhu malu’i Astrazeneca ke ngāue’aki ‘i ‘Iulope.

    (Reference: https://www.ema.europa.eu/en/news/ema-recommends-covid-19-vaccine-astrazeneca-authorisation-eu)

    Pea ko hono faka’atā ko ‘eni ‘i he tu’unga ko e “conditional marketing authorisation”. ‘Oku ‘uhinga ia na’e ‘osi fakahoko pē ‘a hono ngaahi tesi ‘o a’u ki ha tu’unga kuo taau ke fai mo ngāue’aki koe’uhi ‘oku fu’u fiema’u ha huhu malu’i pea ‘e lahi ange ‘a hono lelei tene ‘omai. Ka ‘i he taimi tatau, ‘oku toe ‘uhinga ia ‘e kei hokohoko atu hono muimui’i ofi ‘aupito ‘a e kakai ‘e fai hono huhú.

    Na’e fale’i mai ai ‘a e ngaahi uesia angamaheni (pe side effects) ‘e ala ma’u ‘e ha taha ‘o hangē ko e ki’i mofi, felangāaki pea moe ngaahi tafa’aki ko ia. Ne kamata ai e ngaahi fonua lahi ‘i ‘Iulope ‘i hono ngāue’aki e huhu malu’i Astrazeneca. Ka na’e ‘ikai ke fu’u fuoloa mei ai, kuo ‘asi ‘i ha ni’ihi ‘a e palopalema ‘i honau totó ‘oku ‘iloa ko e blood clot.

    Fakatatau ki he ngaahi ongoongó, ko ‘ene a’u ‘eni ‘o fe’unga moe toko 5 miliona ‘i ‘Iulope kuo huhu malu’i, ko e toko 30 mei ai na’e hoko ai ‘a e blood clott. Ko hono faka’avalisi ia, ko e toko 166,667 kotoa pē na’e huhu malu’i, na’e ‘i ai e ki’i toko 1 ai na’e ‘asi ai e blood clot. Ko e fehu’i leva:

    ‘E ta’ofi nai e ola lelei ‘o e huhu malu’i meí he toko 166,666 koe’uhi kuo hoko e blood clot ki he toko 1? ‘E ta’ofi nai e ola lelei ‘o e huhu malu’í meí he toko 5 miliona koe’uhi ko e hoko ‘a e blood clott ki he toko 30?

    Kaekehe ‘i he fakapotopoto ‘a e kau taki ‘o e ngaahi fonuá, na’a nau loto ke ki’i ta’ofi fakataimi kae fai hono siofi.

    ‘I he ‘aho 11 ‘o Mā’asi 2021, ne tuku mai ‘e he Kautaha Mo’ui ‘a Māmani, pe WHO ‘a ‘enau ongoongo ki he ngaahi fonua ‘Iulope kuo nau ta’ofi hono ngāue’aki ‘a e huhu malu’i Astrazeneca koe’uhi ko e blood clot. Pea na’e mahino ki he WHO ko hono ta’ofi ‘eni ka e fai hono fakatotolo’i.

    ‘I he ‘aho 16 ‘o Mā’asi 2021, ne toe tuku mai ai ‘e he WHO ‘a e fakamatala ‘o pehē ‘oku ngāue ‘enau kōmiti ki ai ki hono vakai’i.

    (Reference: https://www.who.int/news-room/news-updates?fbclid=IwAR2QmPd_CEkKokb-fGKgsADQrTvwMvZaq1JX-ot6btPLSdOr2EnHE3PjpYw)

    ‘I he ‘aho 19 ‘o Mā’asi 2021, ne toe tuku mai ai ‘e he WHO ‘a e ola e ngāue ‘enau kōmití. Ne aofangatuku ‘a e komiti ‘oku kei mā’olunga ange pē lelei ‘o e huhu malu’í Astrazeneca, ‘i hono fakatauhoa ki he uesia tamaki ‘o e blood clot koe’uhi ‘oku fu’u hāhāmolofia, kae ‘ikai ngata ai ko e fu’u uesia tamaki ‘o kapau ‘e ‘ikai ke huhu malu’i.

    ‘Oku tokolahi foki ‘a e ni’ihi ia pea mo ‘enau ngaahi tui fakalotu ‘oku nau tala ‘oku fakatēvolo koaa ‘a e huhu malu’í. Pea ‘oku nau fakasio ha fa’ahinga uesia ‘e ala ‘asi ‘i he huhu malu’í kenau fakailifia’i ‘aki ‘a e kakaí ke ‘oua e huhu malu’i. Pea ‘i he hangē ko e taha e ngaahi uesia ko ‘eni ‘o e huhu malu’i Astrazeneca ko e blood clot neongo ‘a ‘ene fu’u hāhāmolofia ke ‘asi. Pea ‘e talamai leva ‘e he kau tui fakalotu ko ‘eni ke ta’ofi ‘a e huhu malu’i telia na’a hoko ‘a e ki’i uesia ko ‘eni neongo ‘a ‘ene hāhāmolofia.

    Ka ko e fa’ahinga sio ia ‘a e kakai ‘oku nau ta’etaukei ‘i he mo’ui. ‘Oku mahu’inga ke fakatokanga’i, ‘oku malava ke uesia kitautolu ‘i he ngaahi me’akehekehe ‘i he ‘aho kotoa. Ko e fakatātā, ‘i he meimei ta’u kotoa ‘oku hoko ‘a e mate ‘i he hala pule’anga. Fakatatau ki he WHO, ‘oku fakafuofua ki he toko 1.3 miliona e kakai ‘i māmani ‘oku mate he ta’u kotoa ‘i he hala pule’anga. Koe’uhi ko e tokolahi pehē fau ‘a e mate ‘i he hala pule’anga ‘i he ta’u kotoa, ‘oku totonu nai ke ta’ofi ha toe fefononga’aki ‘i he hala pule’anga?

    ‘I ho’o heka ki ho’o me’alelé ‘i he ‘aho kotoa, ‘oku malava ke hoko ha fakatamaki ‘i he hala pule’angá ‘o mole ai ho’o mo’ui. ‘Oku totonu nai keke ta’ofi ai ho’o fefononga’aki ‘i he hala pule’anga?

    Ka ko e fa’ahinga sio ia ‘a e kakai ta’etaukei ‘i he mo’ui, tenau ta’ofi ‘a e fefononga’aki kotoa ‘i he hala pule’angá koe’uhi ko e malava ke mole ai ‘a e mo’ui. ‘Oku ‘ikai tenau fuatautau ‘a e lelei moe koví. Pea ‘oku pehē pe moe ni’ihi ‘o e kau tui fakalotu ko ‘eni ‘oku nau kaikaila mai ke ta’ofi e huhu malu’i. ‘Oku ‘ikai tenau lava ke fuatautau ‘a e lelei ‘o e huhu malu’i, pea moe kovi ‘o e ‘ikai ke huhu malu’i.

    ‘I hono siofi ‘aki ‘eni ha ‘atamai maama mo tau’atāina, tetau fakamulituku ‘oku ‘uhinga lelei ‘aupito ‘a e aofangatuku ne fakahoko ‘e he komiti ‘a e WHO. ‘I he tu’u ki he lelei fakalūkufua, ‘e fakapotopoto ange ke hoko atu ‘a e huhu malu’í ke malu’i ‘a e toko 5 milioná meí he tāmate ‘a e Covid-19, he ko e taha ia e ngaahi taumu’a ‘o e huhu malu’í ke ta’ofi e mate ‘a e kakaí pea meí he Covid-19. Ka ‘i he taimi tatau ke mateuteu ‘a e kau toketaá ke tokonia ‘a e toko 30 ke ‘oua e mole ‘enau mo’uí ‘i he blood clot meí he huhu malu’i. Ko e founga ngāue ia ‘a e fakapotopoto.

    ‘A ia ko hono fuatautau ‘eni ‘o e lelei ‘o e huhu malu’í ‘o fakatauhoa ki he me’a ‘e hoko kapau ‘e ‘ikai ke huhu malu’i. Kapau ‘e hoko atu e huhu malu’í ki ha toe toko 5 miliona fo’ou, ‘e malava ke malu ai e mo’ui ‘a e toko 5 meí he vailasí, ka ‘i he taimi tatau ‘oku malava ke toe ‘asi mai ai e toko 30 fo’ou pea moe blood clot meí he huhu. Ko e me’a ia ‘oku malava ke hoko. Ka ‘o kapau ‘e ‘ikai ke huhu malu’i ha toko 5 miliona fo’ou kae ma’u kinautolu ‘e he Covid-19, ‘e malava ke tokolahi ‘aupito e blood clot meí he vailasí.

    Ko e me’a ‘eni ia kuo ‘osi fakamo’oni’i pea līpooti mai ‘e he ngaahi ongoongó. ‘Oku tokolahi ange hoko ‘a e bood clot ‘i he vailasi.

    (Reference: https://www.youtube.com/watch?v=GfAwoSINv6s&feature=emb_logo)

    ‘Oku toe mahino mei hena ‘oku ‘ikai ko e Astrazeneca pē ‘oku ‘asi ai ‘a e blood clots, ka ‘oku toe ‘asi pē foki ‘i he huhu malu’i ‘a e Pfizer. Pea hangē ko hono fakamā’ala’ala mai, ‘oku lahi ange ‘asi ‘a e blood clot ‘i he kakai ta’e huhu malu’í ‘i he taimi ‘oku ma’u ai kinautolu ‘e he vailasí.

    Pea hangē ko e lave na’e tomu’a ‘oatu, ko e fakamatala ta’ekakato na’e ‘omi ‘e he toketā pea mo e faifekaú. Ko e lave ki ai ‘o pehē na’e ta’ofi e huhu malu’i Astrazeneca ‘i he ngaahi fonua, ‘oku mo’oni ia ka ‘oku ta’ekakato. Pea ko ‘ene kakató leva ‘eni. Na’e ta’ofi ‘i he ngaahi fonua kae kei hoko atu pē ‘a e ngaahi fonua. Ne fakahā foki ‘i he ‘enau polokalamá na’e ta’ofi he fonua ‘e 28. Pea neongo ‘o kapau ne mo’oni ‘eni, ka ko e fonua fakakātoa ‘e 142.

    (Reference: https://www.astrazeneca.com/media-centre/press-releases/2021/astrazeneca-advances-mass-global-rollout-of-covid-19-vaccine-through-covax.html)

    ‘Oku ‘uhinga ia na’e ta’ofi he fonua ‘e 28 kae kei fakangofua he ngaahi fonua ‘e 114. Ko e ngaahi fonua ko ia na’a nau ta’ofi, ne hili hono fakamā’ala’ala meí he WHO, ne ‘i ai honau tokolahi na’a nau toe foki mai ‘o hoko atu hono ngāue’aki e Astrazeneca. Ne ‘osi tuku mai ‘eni ‘i he ngaahi kautaha ongoongó. Ko e fakatātā, ‘i he ‘aho 12 Mā’asi 2021 ne ‘omi ai ‘e he ongoongo ‘a e BBC ‘a hono ta’ofi ‘e Tailani ‘a hono ngāue’aki e huhu malu’i Astrazeneca.

    (Reference: https://www.bbc.com/news/world-asia-56369550)

    Pea ‘i he ‘aho 14 ‘o Sune 2021 ne tuku mai ai ‘e he ongoongo ‘a e CNN ‘a e toko hoko atu ‘a Tailani ‘i he huhu malu’i Astrazeneca.

    (Reference: https://edition.cnn.com/2021/06/08/asia/thailand-coronavirus-vaccine-astrazeneca-rollout-intl-hnk/index.html)

    ‘A ia ‘oku nau tāketi ki he fo’i huhu malu’i ‘e 100 miliona pea ko e 61 miliona ai meí he Astrazeneca.

    Ko e fie tokoni pē ki hono fakamaama ki he kakai ‘o e fonuá, kenau fakatokanga’i ‘oku ‘i ai e ngaahi ‘uhinga lelei mo fakapotopoto ‘oku kei teke mālohi ‘aki ‘etau huhu malu’i. Pea ‘oku ‘ikai ko ‘eni pe. Kapau ‘e ‘ikai ketau tokanga ke fakakakato ‘etau huhu malu’í ke malu ‘a e fonua, ‘e toe tuai ange ai hono fakafoki mai hotau kakai ‘oku nau si’i tukuvakā atu ‘i he ngaahi fonua muli. ‘Oku lahi ‘a e ngaahi tafa’aki ke fai hono fakatokanga’i heni pea ‘e hokohoko atu ki ai hono lave’i ‘i he kaha’u, kae pehē ki hono fakatonutonu ‘a e ngaahi fakamatala ta’emo’oni fekau’aki pea mo ‘etau huhu malu’i.