‘E toe ake nai PTOA mo e PAK mei he ‘ena palopalemá?

0
53

Kalafi Moala

KOE’UHÍ ‘oku toe pe nai ha uike ‘e 8 pea fakahoko ‘a e fili Fale Alea ‘o e 2021, ‘oku fakatupu heni ha fifili pe ‘e lava nai ‘a e ongo fa’ahi fakapolitikale lalahi ‘o e fonuá ke toe ake mei he fu’u palopalema lahi kuo na tofanga ai?

Ko e tefito’i palopalema ‘o e ongo fa’ahi ni lōua ‘oku fekau’aki mo e tōlalo pe ko e ‘ikai mahino ‘o hona takitaha mafai taki. Kuo hola e pule lelei ia mei he ongo fa’ahi ni.

Lolotonga ‘ení ‘oku ‘alu pe taimí mo e tokolahi ange kau kanititeiti ‘oku nau tu’u tau’atāina ki he filí.

Ko e PATOA ‘oku ‘ikai ke holo ‘a e fakafekiki mo e fefusiaki ‘i he loto’i paatí fekau’aki pe kohai koaa ‘oku takí. Pea ‘ikai ngata aí, ka ‘oku toe mālohi pe foki mo e fefusiaki pe ko e konga fē ‘o e PTOA ‘oku ne fakafofonga’i iá.

‘Oku ‘ikai ke konga ua pe ‘a e PTOA, kā kuo konga 4 pe 5 pe lahiange ai. ‘Oku takitaha ai hono taki mo ‘ene takitaha ngāue ‘oku fai.

Ko e kulupu mālohi mo tokolahitahá, fakatatau ki he ngaahi fakamatala kuo ma’u mai, ko e kulupu ‘oku taki ai ‘a Semisi Sika, ko e fakafofonga ‘o Tongatapu 2. Ko e kulupu ‘eni ‘oku ‘i ai ‘a e poate pule ‘oku ‘iloa ko e “core team”, ‘a ia ko kinautolu ‘o e kau memipa PTOA ‘oku ‘i he Fale Aleá.

‘Oku kau ki he kulupu ni ‘a e kau fakafofonga Fale Alea ‘e toko 7, ‘a ia ko Tongatapu 2, 4, 5, 8, 9; Ha’apai 12 mo 13. Na’e toko 9 ka kuo mavahe ‘a Siaosi Pohiva mo Saia Piukala. ‘E ui e kulupu ni ko e PTOA 1.

Ko e kulupu hono uá, ko e kulupu ia ‘oku taki ai ‘a Siaosi Pohiva, fakafofonga ‘o Tongatapu 2, pea ko ‘ene Komiti Pulé, ‘oku fa’u ia mei he kau fakafofonga taki toko ua mei he vahenga kotoa pē ‘i Tonga ni. Ko e nima to’omata’u ‘o Siaosí ko Piveni Piukala, ‘a ia kuo hoko ia ko e le’o ki he kulupu ni. ‘E ui e kulupu ni ko e PTOA 2.

Ko e kulupu hono tolú, ko e kulupu ia ‘oku ‘i ‘Amelika, ka ‘oku nau fengāue’aki pea mo ha ni’ihi ‘i Tonga ni. ‘Oku taki ‘i he kulupu ni ‘a e fefine ko Tilila Siola’a Walker Sumchai. Ko e fefine ‘eni na’a ne fokotu’u ‘a e palani līpa’anga ko e Tongi Tupé, ‘a ia ko e palani tānaki pa’anga fakapilamiti. ‘Oku fakafuofua kuo a’u ki he $11 miliona e pa’anga kuo tānaki ‘e he kulupu ni, pea ko e mo’uá ‘oku ‘i he $8 miliona kiate kinautolu na’a nau līpanga aí.

Ko e palopalema lahi kuo hoko ki he Tongi Tupé, pea kuo fakamahino mai ‘e he ku PTOA pē, ko e ngāue kākā ‘eni ‘a ia kuo lavea ai e kakai tokolahi na’a nau līpa’anga aí. Ko e PTOA ‘o ‘Ameliká, ko e PTOA Global Movement ia. ‘E ui kinautolu ko e PTOA 3.

‘Oku ‘i ai foki mo e kulupu PTOA ‘i Nu’usila mo ‘Aositelelia. ‘Oku kehekehe pe kau taki kuo ‘asi maí, pea ‘oku makatu’unga pē he kau fetu’utakí, pe ko e PTOA fē ‘oku nau kau ki ai. ‘E ui ‘a Nu’usila ko e PTOA 4, pea PTOA 5 ‘a ‘Aositelelia.

‘I he mavahevahe ko ‘eni ‘a e PTOA, ‘oku mahino mai ‘a e tokolahi ‘o e kau poupou ‘oku nau nofo muli, pea toe lahiange foki mo ‘enau pa’angá, kā kuo holo lahi e fefalala’aki.

Kohai koaa ‘oku lea ma’ae PTOA?

‘Oku lolotonga fai e kē he pa’anga, ‘o ‘ikai ko e kē pe he mafaí. Kā, kohai koaa ‘oku lea mo fakafofonga’i ‘a e PTOA? Kuo lahi e ngaahi le’ó, pea kuo nau fepakipaki ‘o ‘ikai toe mahino pe ko e hā koaa e taumu’a pe ko e visone ‘a e PTOA.

Ko e me’a pē ‘eni ‘oku mahinó, ‘oku hu’u kehekehe ‘a e ngaahi taumu’a ‘a e ngaahi kulupu PTOA, kā ‘oku nau taha pe he taumu’a ke fakakakato ‘a e Temokalatí, ‘a ia ko hono fili kotoa ‘a e kau fakafofonga ki Fale Alea, kau ai e nopelé, ‘e he kakaí.

Pea ‘oku ‘i ai foki ‘a e PTOA ‘e ni’ihi ‘oku nau tui ke to’o ‘aupito ha fa’ahinga mafai fakapolitikale ‘o e Tu’í. ‘Oku ‘ikai ke nau tui ko e Tu’í ko e mafai fakapalanisi ia ‘o e ngaahi mafai pulé.

Ko e taha e le’o ‘oku ongo mai mei he PTOA 2 ko e tangata fale’i ko Piveni Piukala. Ko e kaungāme’a vivili ‘eni ‘o Siaosi Pohiva, pea na’a ne kau he kau fale’i ki he Pule’anga kimu’á.

‘Oku tokotokolahi ‘a e kau PTOA ‘oku ‘ikai ke nau poupou pe tui tatau mo Piveni, neongo ko e kanititeiti ia ki Tongatapu 7. ‘I ha fakamatala ‘a Piveni ki he polokalama letio mei Nu’usila ‘oku taki ‘e Setita Tu’i’onetoa, na’a ne fakahā ai ko e tokotaha fale’i ia kia Afimeimo’unga Hola.

Na’a ne pehē ‘i hono faka’eke’eke, ko ‘ene fale’i kia Afimeimo’unga, ‘oku ‘ikai ke ne fiema’u ha loea, ka ke ‘alu pea ia ‘o tala e mo’oni ‘i Falehopo. Na’a ne toe pehē foki ‘oku ‘ikai ke lava ke ma’u ‘a e fakamaau totonu ‘i he Fakamaau’angá. Ko e me’a pē ke fakahokó, ko e “’asi mai ‘a Pilolevu ‘o talamai pe ‘oku tonu pe ‘ikai ‘a e lau ‘a Afimeimo’unga.” Ko e tā fefeka ‘eni ki he Fakamaau’angá mo e Laó.

‘Oku ‘iloa pe foki ‘a Piveni Piukala ko e tokotaha ‘oku fakafetau ki he Tu’í mo hono Falé, pea ‘oku ne tui ko e taliui ‘a e ma’u mafaí ‘oku ‘ikai ki he Konisitutone pe Lao, ka ki he kakaí.

Ko e taha ‘o e kau PTOA mei Tongatapu 1, na’a ne fakahā ka ‘i ai ha holo e poupou kia Siaosi Pohivá, koe’uhí pē ko e ‘ikai lava ke ne tu’u tau’atāina meia Piveni.

‘I ha fakamatala ‘a Mateni Tapueluelu ‘i hano faka’eke’eke he letio, na’a ne pehē ko e palopalema ‘eni ‘oku nau fekuki mo ia fekau’aki mo e feinga ke ngāue vāofi mo Siaosi Pohivá, “ ko e fekau’aki ‘a Piveni mo Siaosí.”

“’Oku ‘ikai ko ha fakafofonga Fale Alea ia, kā ‘i he fa’a fai e fakataha mo e Palemia kuo pekiá, neongo ko e fakataha pe ‘a kimautolu e kau fakafofongá, na’e ha’u pe ‘a Piveni ia ki ai, hange koee ko ha fakafofonga ia,” ko e lau ia ‘a Matení.

Na’a ne pehē, taimi ‘e ni’ihi ‘oku nau ō atu kinautolu ke fakataha he ‘Ofisi ‘o e Palemiá, ‘oku mohe mai ai ‘a Piveni ia. “Ko e anga ia e fa’ahinga ‘atamai mo e ta’etoka’i ‘a e tokotaha ko ‘eni ne mau sio tonu ai, pea ‘oku ‘ikai ha liliu ‘o a’u ki he ‘aho ni,” ko Mateni ia.

‘Oku lahi foki e ngaahi le’o kehekehe ‘o e kau tangata mo fefine fetu’utaki mei he PTOA, pea neongo ‘enau kehekehe, pea taulau hangatonu he taimi ‘e ni’ihi, kā ‘oku hoko ‘eni ko ha me’a ‘oku fihi ai e fakakaukau ‘a e kau muimui, he ‘oku ‘ikai ke nau ‘ilo pe kohai koaa ‘e fai ha fanongo mo ha tui ki ai.

Fuofuoloa e longo ‘a e PAK

Talu hono fakahū pilisone ‘a e Tokoni Taki ‘o e PAK mo e “’enisinia” ki he Pule’anga ‘o Pohiva Tu’i’onetoá, mo e hangē koee ‘oku ki’i longo e fetu’utaki mei he PAK.

‘Oku ‘ikai ko ha me’a si’i ‘a hono tautea ngāue popula ha Minisita mei he Pule’angá, pea toki fakafisi mai pe mei Pilisone. Pea ‘oku ‘ikai foki ko ha me’a si’i ‘a e tautea ngāue pōpula ‘a e Tokoni Sea mo e tokotaha na’a ne tataki hono fokotu’u ‘o e PAK, ‘Etuate Lavulavu.

Ko e keisi ‘o e ongo Lavulavú, ko e keisi faihala mo ngāue kākā lahitaha ia ‘i Tonga ni he ta’u ‘e 50 kuohilí. ‘Oku mahino ‘eni ‘a e kei lava lelei ke ma’u e fakamaau totonú ‘i Tonga ni, pea mei he Fakamaau’angá.

Ko e me’a foki ne kehe ai e keisi ko ‘ení he ko e Minisitā mo hono husepaniti ko e Minisitā mālōlō mo e Tokoni Sea ‘o e PAK. Hoko ‘eni he funga ‘o e PAK, pea toe ‘ohake ai neongo ‘oku te’eki ai ha faka’ilo ‘a e ngaahi tukuaki’i faihala mo ngāue kākā ‘a e ni’ihi ‘o e kau Minisitā ‘o e PAK.

Palopalema ‘a e PAK? Hange ko e lau e taha ‘o e Minisita mei he Pule’angá ka ‘oku ‘ikai loto ke fakahā hono hingoá: “’Oku ‘ikai ke toe kehe ‘a e PAK ia mei he PTOA he palopalemá. Kuopau ke fai ha liliu lahi ia ki ha Pule’anga fo’ou ke fai ai ha laka kimu’a.”

Ko ia ai kuo fakatou tō ‘a e PTOA mo e PAK he luo ‘o e faihalá, ta’emaaú, mo e ta’efalala’angá. Kohai leva ‘e fai ki ai ha falala he fili ‘i Novemá?